Bogodu jwa dihutshane bo keketse

Bogodu jwa leruo, segolo jang dihutshane bo tsweletse ka go golela pele.

Se, se tlhalositswe ke mogolwane wa sepodise, Rre Amos Mothatego, kwa thuto-seka dipuisano tsa twantsho bolwetsi jwa tlhako le molomo, e e neng e tshwaretswe kwa Tshidilamolomo kwa morakeng wa ga Rre Boitshoko Maphane, ka Matlhatso.

Rre Mothatego o supile fa mo nakong e no go setse go utsulwe dipudi di le 456 le dinku dile 193 go simolola Mopitlo a rogwa go tsena Phukwi a ya fifing.

A re goya ka ditlhotlhomiso tsa ba sepodise, go supagala fa diruiwa di tlodisediwa kwa South Africa. Rre Mothatego o kaile fa se, se busetsa barui kwa morago le go ba kotlometsa maikutlo.

O kopile barui go tshwaragana le sepodise go lwantsha borukutlhi.

Mabapi le go lwantsha tlhako le molomo,

Rre Mothatego o supile fa ba setse ba kwadisitse melato e le 107, fa e sa le Mopitlo a simolola, e bontsi e le go tlhoka go sala tsamaiso morago ya thibelo bolwetse.

A re bontsi e setse e duetswe mme go setse e le mebedi e e emetseng go ya kwa kgotla tshekelo.

Rre Mothatego a re mo nakong ya gompieno, seemo se a nametsa ka go lebega setshaba se utlwile molaetsa mme melawana e salwa morago sentle.

Barui ba supile fa go le botlhokwa gore puso e oketse dikatlholo tsa go tlhoka go obamela melawana ya go sireletsa bolwetsi.