Broadway Motors e Abela Kokelo Dikobo

Khamphani ya Broadway Motors e abetse kokelo sa Mahalapye dikobo di le masome a matlhano, seo e le bontlha bongwe jwa maitlamo a yone a go busetsa kwa setshabeng.Mogolwane wa Broadway Motors Rre Joseph Tamari a re ba ipeetse seelo sa botlhano mo lekgolong la letseno la bone go thusa setshaba se ba direlang mo go sone.

Fa a bua kwa kabong dimpho ka Labotlhano, Rre Tamari a re ba ne ba tsibogela kopo ya dikobo e komiti ya kokelo e neng ya ba e baya pele, seo e le tsela ya go supa fa le bone ba kgathala ka balwetse e bile ba lemoga fa bolwetse bo ama botlhe.

Molaodi wa kgaolo ya Mahalapye, Rre Ernest Phiri o akgoletse ba Broadway tiro e ntle e ba tsweletseng ka go e dira ya go thusa setshaba.

Rre Phiri a re ga se la ntlha khamphani eo e dira e thusa setshaba, a tlhalosa fa e dirile di le mmalwa. A re maiteko a khamphani a supa fa e itlamile go diragatsa matshego a tebelopele ya setshaba ya 2036.

Rre Phiri o rotloeditse tirisano mmogo ya maphata a puso le makalana a a ikemetseng go aga botsalano, a re tshwaragano e, e ka thusa go tsamaisa kgaolo.

Fa a amogela dimpho, motshwarelela-mogolwane wa kokelo ya Mahalapye, Dr Ado Kabatunanga o ne a lebogela dimpho, a supa fa e se selo se sennye ka e bile se dirilwe ka lorato.

Dr Kabatunanga a re mpho eo e tlaa thusa balwetse le gone go letla badiri go dira tiro ya bone sentle.

Modulasetilo wa komiti ya bogakolodi ya kokelo, Rre Boniface Disho, a re tiro ya komiti eo ke go thusa bogogi jwa kokelo go fa balwetse seriti fa ba robaditswe.

Rre Disho a re ba lemogile fa sepatela se nale letlhoko le le ntsi le le akaretsang tlhaelo ya dikobo, ka moo ba ne ba kopa dithuso kwa go ba Broadway Motors.

A re ba tlaa tswelela ba tla ka maano a go kgobokanya madi a tlaa thusang kokelo ya Mahalapye.